Thursday, August 2, 2007

حوار الأجيال


اليوم يصادف ذكرى الغزو العراقي

على دولة الكويت

2 August

و صدف بعد إن اليوم خميس
الله لا يرد ذاك اليوم
عشنا بخوف ورعب وشفنا الموت
وعرفنا معنى الأسر والتشرد
بعد ما كنا عايشين بأمان
والكل حاسدنا على نعمة السلام

الله يرحم شهداؤنا الأبرار ويسكنهم فسيح جناته
ويطول بأعمار شبابنا وشيابنا ويحفظ بناتنا وأطفالنا
والشعب الكويتي بين معدنه الأصيل
والعالم شهد عالأبطال اللي قاوموا
والقصص اللي صارت لو نقولها ما نخلص
إنشالله هالديره دوم محفوظه بأهلها وحبايبها
واللي وقفوا معانا بهاليوم شايلينها لهم طول ما إحنا عايشين

فرحة التحرير راح أذكرها لآخر يوم من عمري

حسينا إنا نولدنا من يديد
وصج ما بعد الضيقه إلا الفرج

الله يرحمك يا بابا جابر

ولهنا على هيبتك وإبتسامتك
والله اللي كان مريحنا وجودك
خصوصا بهذيك الأيام السوده

وفرحتنا ما اكتملت إلا برجعتك

كان يوم بالعمر

كل العيون دمعت بشوفتك مستانس

رحمة الله عليك

يا بو مبارك


الكلام ما يعبر عن اللي بالقلب
واللي عاشوه أهل الكويت ايام الغزو محد يقدر ينساه
أجدادنا حافظوا عالديره بمعارك يشهد لها التاريخ
وعمروا بلدهم الكويت
وشبابنا واصلوا المسيره
وخيبوا ظن العدو الله حفظ الكويت طول هالسنين
العفو عند المقدره
يمكن نغفر
خصوصا عن الجيل الياي بالعراق
إذا أحسن النيه
بس لا يمكن ننسى
والله ما راح ننسى
قبل سنتين آنا وأخوي
+
GROUP
وايد حلو بشبابه وبناته
وبمساعدة وايد ناس
وعلى راسهم المهندسه
أشواق المضف
سوينا أوبريت وطني
وأهديناه لتلفزيون الكويت
وسميناه
حوار الأجيال
مدته 6 دقايق
وإنعرض لمدة إسبوع على كل محطات الكويت
و يتكلم عن علاقة الماضي بالحاضر
والحوار بين
جيل الماضي وشباب المستقبل
وهذا كان شعارنا

إقروا الموضوع وعطوني رايكم

واللي لحنلي إياه الفنان الحبيب فواز الرجيب

.......................................

خالد اليوسف + صوت الراحل عوض دوخي

أوه يا مال
أووووه يا مال
أووه يا مال
أوووووه يا كويت


فواز الرجيب

أمنا إهي أمنا حاضرنا

إهيا وماضينا

نحبها ونعشقها ونفديها

وفيها تربينا

الكويت الكويت

بسام الجزاف


لكل ديره

ماضي وحاضر

لكن ماضي الكويت حاضر

ومستقبلها

بعون الله زاهر



خالد اليوسف
وشلون عمرتوا بلدنا
حبنا الغالي
وشلون خليتوا لنا إسمه
بالسما عالي
بالماضي صغيره
وإنتوا بنيتوها
وبخيركم صارت
عروسه شحلوها


المجموعه
بإخلاصنا وحبنا
وعزيمة الطيبين
علينا رايتها
في كل زمان وحين
إحنا بنيناها
وبالعين شلناها
وأخذنا من دمنا
ورحنا وعطيناها


شجون الهاجري
الله
إشكثر تعبتوا
وهي تستاهل تعبكم
وهذا منا عهد والله
إحنا بنسوي مثلكم
إحنا بنسوي مثلكم
إحنا بنسوي مثلكم


المجموعه
إي نعم هذي أمانه
إي نعم .. إي نعم
كويتنا حلوه بأهلها
والنعم .. والنعم
زانت ونجمه بسمانا
سمانا .. سمانا
ماكو بالدنيا مثلها .. ماكو بالدنيا مثلها

المجموعه
أمنا إهي أمنا حاضرنا وماضينا
على حبها تيمعنا عسى ربي يهنينا
الأطفال
أمنا إهي أمنا وهي أحلى أمانينا
لو درنا ولفينا مثلها لا ما لقينا

كل المشاركين بالتناوب

الكويت الكويت
الكويت الكويت