Friday, October 24, 2014

حلو ومو حلو


كنت بإجتماع مهم
يخص طرح فكرة حملة إعلامية
لأحد الجهات الحكومية الكبيرة

 وبالإجتماع كان فيه شخص غير مختص بمجالنا

يعني وجوده ما كان له أي داعي

سأل عن شغلنا السابق، وهالشي من حقه
ولو إنه من الإحترام إنه يسأل عنا قبل ما نوصل
خصوصاً لما الإتصال يكون منهم مو منا

عددت له بعض الأعمال
انا أتكلم وهو يطالع السقف
وقال: مع احترامي لكم، هالإعلان ما عجبني

قلت له مع ابتسامة: شكراً وهذا من ذوقك

ذوقك أقصد فيها شي وإنتوا فهموها بمزاجكم

قال ليش مخلين بداية الإعلان باللغة العربية؟
وما نطرني أجاوبه وعفس ويهه وقال: ما عجبني ما عجبني

بعد نهاية الإجتماع الناجح
ما عدا اللي صار مع هالشي

وريته الإعلان عاليوتيوب
وقلت له وين اللغة العربية بالإعلان؟
إذا هذي ملاحظتك الوحيدة
يعني خلني أكلمك على قدّك
قال: يمكن آنا حسيت إنها لغة عربية
قلت له: همممـ هزيت راسي وطالعت السقف

الزبدة من الموضوع: اللّي يقول لي شغلك
حلو - مو حلو - عجبني - ما عجبني
راح أعتبره من الجمهور العادي اللي أحترم متابعته
وبقول له: مشكور حبيبي على متابعتك

بس اللّي يتكلم عن الفكرة والإضاءة والتكنيك
راح أحترم عقله وأرد عليه بالتفاصيل
يعني أفيده وأستفيد منه